जिल्ह्यात दोघांना ईडीचे समन्स; पुण्यातून एकाला अटक, दोन दिवस कोठडी

जळगाव लाईव्ह न्यूज । २९ सप्टेंबर २०२१ । राज्यात गेल्या काही वर्षांपासून गाजत असलेल्या भोसरी भूखंड प्रकरणात काही दिवसांपासून माजी मंत्री एकनाथराव खडसे यांचे जावई गिरीश चौधरी हे ईडीच्या ताब्यात आहेत. खडसे कुटुंबामागे ईडीची चौकशी सुरु असतानाच मंगळवारी या व्यवहारात महत्वाची भूमिका असणारे तत्कालीन उपनिबंधक रवींद्र मुळे यांना देखील अटक करण्यात आली आहे. पीएमएलएच्या विशेष न्यायालयाने मुळेंना दोन दिवसांची न्यायालयीन कोठडी सुनावली आहे. तसेच ईडीने अजून इतरांना समन्स बजावण्यासाठी न्यायालयाकडून मुदत वाढवून मागितली आहे.

भोसरी येथील वादग्रस्त भूखंड खरेदी प्रकरणी माजी महसूलमंत्री एकनाथराव खडसे यांच्यासह इतरांवर सक्तवसुली संचलनालय म्हणजेच ईडीने गुन्हा दाखल केला होता. या प्रकरणी ईडीने दोनदा एकनाथराव खडसे यांची चौकशी देखील करण्यात आली आहे. खडसे यांचे जावई गिरीश दयाराम चौधरी यांना ईडीने ५ जुलै २०२१ रोजी अटक केली असून तेव्हापासून ते ईडीच्या ताब्यात आहेत. काही दिवसांपूर्वीत या प्रकरणात एकनाथराव खडसे, मंदाताई खडसे, गिरीश दयाराम चौधरी आणि तत्कालीन उपनिबंधक रवींद्र मुळे यांच्या विरोधात आरोपपत्र देखील दाखल करण्यात आलेले असून मंदाताई खडसे यांना चौकशीचे समन्स देखील बजावण्यात आले आहेत.
गेल्या काही दिवसांपासून ईडीचे पथक या प्रकरणात तत्कालीन उपनिबंधक रवींद्र मुळे यांचा शोध घेत होते. सोमवारी अटकेचे समन्स काढत ईडीने पुणे येथून रवींद्र मुळे यांना ताब्यात घेतले आहे. भोसरी येथील जमिनीचे बाजारमूल्य हे २३ कोटी रूपये असतांना खडसे यांच्या आप्तांसाठी याचे मूल्य २.७ कोटी रूपये इतके केले. यातून गैरव्यवहार झाल्याचा ठपका ईडीने ठेवला आहे. तर एकनाथराव खडसे यांनी या सौद्यात आपल्याकडील ५० लाख रूपये मंदाताई खडसे यांच्या खात्यामध्ये वळविले आहेत. यात १५ लाख रूपये रोकडच्या स्वरूपात भरण्यात आले होते. यातील ३८ लाख रूपये भोसरी येथील भूखंडाची खरेदी करण्यात आल्याचे ईडीने आपल्या आरोपपत्रात नमूद केले आहे.

ईडीने भोसरी भूखंड खरेदी प्रकरणात तत्कालीन उपनिबंधक रवींद्र मुळे यांच्याविरुद्ध अटकेचे समन्स काढत सोमवारी अटक केली आहे. सोमवारी पीएमएलएच्या विशेष न्यायालयाने मुळेंना दोन दिवसांची न्यायालयीन कोठडी सुनावली आहे. याप्रसंगी मुळे यांचे वकील मोहन टेकावडे यांनी ते चौकशीत सहकार्य करत असून या प्रकरणातील मुख्य संशयित नसल्याने त्यांना अटक करू नये असा युक्तीवाद केला. मात्र न्यायालयाने त्यांना दोन दिवसांची कोठडी दिली आहे.

तर याच सुनावणीत ईडीने खडसे कुटुंबाला चौकशी करण्याच्या हेतून समन्स बजावण्यासाठी वाढीव वेळेची मागणी केली आहे. या प्रकरणात अजून चौकशी करण्याची आवश्यकता असल्याने गेल्या आठवड्यातच खडसे दाम्पत्याला प्रोसेस इश्यू करण्यात आलेले आहेत. यानंतर आता चौकशीसाठी अजून समन्स बजावण्यात येणार असल्याची माहिती ईडीने न्यायालयात दिली. याबाबत टाईम्स ऑफ इंडियाने वृत्त दिले आहे.

दरम्यान, आज दुपारपासून ईडीने जिल्ह्यात एका बड्या नेत्याला अटक केल्याचे संदेश फिरत आहेत. जळगावात सध्या तरी कुणालाही अटक झाली नसून केवळ समन्स बजावले असल्याची माहिती सूत्रांनी दिली आहे.

बातमी शेअर करा

जळगाव लाईव्ह न्यूजचे अपडेट्स मिळवण्यासाठी आम्हाला फॉलो करा

टेलिग्रामफेसबुकट्विटरइंस्टग्राम युट्युबगुगल न्यूज